2011-10-16

No Good! 米攪啦!

日日都忙到甩肺,上星期日忽然有空檔坐底唞唞,同阿爸阿媽阿仔坐定定睇下無線電視,睇到個熟口熟面,但白髮多左好多既阿蘇介紹京都。最近又真係多左朋友去京都玩,舊年聖誕我都諗住同朋友去,點知買唔到機票,真係遺憾 =.=

講番阿蘇,一開場佢係京都個唔知咩塔上面,講講下下風景,忽然話京都好似佢!一樣咁有性格,一樣咁串,堅持樓宇不可大紅大紫,要維持古色古香風貌,OMG,京都好有特色,我明,但用京都比喻你大姐!你讚京都定係讚你自己丫!?有無咁自大吖你。呸!

然後,一路講佢用六百蚊港幣買一把刻左佢個大名既菜刀;介紹炒栗子,又淨係影住佢個大頭,仲要踩香港啲炒栗子用個so call"核凸"紙袋裝住,人地日本呢就用個錦盒裝住,賣四百幾蚊;佢大姐仲要花大嗱嗱六百幾蚊食個栗子下午茶;食住舊日本和牛,大叫"好有牛味";一路講點樣沖茶,又話人地煩,又話自己心急;佢帶住個日本朋友去食天婦羅,有佢講無人講,個朋友做左人肉佈景板,然後講佢點解做左京都咩咩旅遊大使,再長篇大論,講佢大姐幾有愛心去幫日本。。。總之,我睇左一半,心都煩埋,只係覺得如果呢個係旅遊節日,我會覺得京都啲野好Q貴,仲懶高貴,唔去都罷,咁佢都底係幫緊日本,定係幫日本倒緊米吖!

我只係覺得呢個係佢真人騷,自我宣傳兼證明狗口長不出象牙既道理。