饒舌的樓盤名字

越來越多專欄博客批評新一批的樓盤名字古怪饒舌, 叫不出口或難明意思等等. 我接觸的多是較老及較大眾的屋苑, 如: 太古城, 駿景園, 實非尺價6, 7 萬的所謂'豪宅', 所以都好想搜尋一下, 都底2009及2010年落成的樓盤有多怪.

峻弦 Aria [飛鵝山畔] 讀音應是'俊言'吧, 但我想有更多人讀'俊完', 莫非它像"峻嶺上的一條弦綫"? 咁米好牙煙?!

天滙 [半山干德道39號, 33層高, 卻有88樓!!] 阿李生話外國好多樓宇都'跳樓', 係你地香港人大驚小怪, 啋! 我就唔想'跳樓'啦! 無啦啦, 最高層係88樓, 落一層變左68樓喎, 你估講鬼故咩. 天滙同棟樓又有咩關係呢? 我真係聯想唔到喎!!!

皇璧 The Westminster Terrace [汀九] 咦! 將來應該有赤壁, 九龍壁同原壁! :)

富甲半山 [何文田] 呢個名實在太俗氣...我諗起農夫首'富甲天下'!

御龍山 The Palazzo [火炭] 我住係度, 係米要攪到御龍咁大件事? 我怕我唔夠殺氣

銀湖‧天峰 Lake Silver [烏溪沙] 感覺好似好鋒利...怕怕!

懿峯 Seymour [半山西摩道] '懿'真係好靚...之但係多筆劃又難寫...申請電話綫, 寬頻綫, ICABLE, 電力供應時, 個張form啲格仔綫仔咁細, 實寫唔到上去啦.

名鑄 The Masterpiece [尖沙咀] 當自己係一件藝術品咁賣, 唔怪得咁貴啦. 個設計師係米仲健在呢? sorry!

葡萄薈 La Grande Vineyard [元朗] 睇個名都知係綠草如茵, 親近大自然啦. 但個英文名點讀啫! 係元朗仲有另一個屋苑叫 '葡萄園'架!

Aqua 33 [無中文譯名] [薄扶林] 無中文名其實好煩, 尤其你訂左野, 叫人送貨, 送速遞時...

曉峯 Mount East [北角] 曉峯呢個名用到爛, 全香港應該有7個曉峯x, 曉峯yy

The Icon [無中文譯名, 2010年落成, 半山干德道, 有逾百呎戶外泳池, 而且是空中泳池!!]
都話無中文名好煩咯, icon呢個字其實都好out...但係我好好奇佢個空中泳池係點樣呢...


傲翔灣畔The Sail at Victoria [域多利道] 係域多利真係自由最保貴

York Place [莊士敦道] york呢個真字都out啦, 連york牛仔褲都消失左十幾年

形品 Lime Habitat [北角明園西街] 救命!!! 如果有一日你問個朋友住邊, 佢答: "形品", 肯定十個九個都唔知佢講咩, 仲會估: 誠品? 誠懇? 甜品? 良品?

譽‧港灣 the Latitude [東九龍太子道東] 寫自己個地址時係米要加埋個點??

天璽 The Cullinan [柯士甸道西] 勁吖, "天上的玉璽"吖, 我怕我命賤受唔起吖, 所以都無錢買.

i-home [大角咀, 無中譯名, 我提議"艾空" 或者 "埃胸", 正! ^^]

海峰 Vista [九龍福華街] 海峰都是用到爛的名字吖! 全香港有六個海峰mud, 同海峰物. vista? 係米要用埋microsoft的window? vista的解釋係 "(從兩排樹木或房屋等中間看出去的)狹長的景色;遠景"(from yahoo)...咁個景觀應該麻麻地!

豪門1期 Le Billionnaire Phase I [九龍城沙浦道] 嫁唔到入豪門的女士們, 儲夠四百三十萬(都係夠買700呎啫)以上都可以住入"豪門".

MOD595 [ 旺角新填地街] 係旺角區, 居然無中文名, 古怪怪咁得啲英文字加數字, 好似password/login咁, 係米high tech啲?! 唯有叫佢 "毛唔x唔", 佢個會所仲叫 '毛級'吖.

戈林 Godi XI [ 沙田嶺路] 有說取自意大利中古別墅Villa Godi之名, 並音譯, 但有人指 "戈" 解 "戰爭", "戈林" 等於 "戰爭之森林", 好像並不適合人們安居樂業噃.

名御 The Brand [元朗] 食字?! 個"御"都係爛名, 已用於38個樓盤.

御濤‧凱濤 Perfetto [青山公路100號] 好多筆劃, 又諗起填申請表...意大利文?? 又點讀? 做咩而家啲樓盤英文名已經唔再係英文?

原築 La Grove [元朗] 則係點? "原汁原味的建築"? 定係"原始築屋"??

以上樓盤資料來源: 中原地產

其他純屬個人吹水, 如果你真係以上樓盤業主, 請多多包涵!

ps 遺忘了一個 名城 [大圍] 地段不錯, 但名字太邈, 好'娘'.